Bläihds Gsichd

 

Ab und zouh gäih ich am Sunndohch middohch a ermohl zum Ess`n. Ich hobb dou er gans nedds Schdammlokol in der Näh voh meiner Bud´n. Des hassd also, dass i ned mid´n Audo fohrn mou, sondern zu meim Scheiferler mid Glehs er bisserler wos drink´ng derf und des goud nohrudschd, ohne Angsd hohm zu mäihn, dass der gleih in Labb´m nehmer, bevuhrsders verdauhd hasd.

Also bin i er weng hogg´n bliehm und hobb mi hald er weng mid di andern Schdammgäsd underhald´n.

Schäih langsam sin di andern Middohchsgäsd verschwund´n und dann hod si a der Koch aus sein Schlubfwing`kl rausdraud. Hoggd si gmiedli an den Drehs´n hi indem er sein nichd zu glanner Bauch neizwiggd und fängd oh, er Zeitung zu les´n. Su er Sunndohchsbläddler, wous umersunsd gibbd, wall ern Hauf´n Werbung drinner schdäihd.

Dasser ieberhabbds wos gsehng hod mid seine Glubsch´aung und däih feisd´n Bäggler hod mi scho ieberraschd. Abber scheinbohr wohrer ned ohne Erfolch in der Schul, wall affahmohl fängder oh, iehbern Glubb zu labern. Voh die Bayern isser dann zum Werdschafdsdeil und ledsd-endli ieber di Gladsch-schbald´n zur Bollidig kummer. Dou hodder si dann nu mehr ahfgrehchd wäih iebern Glubb!

Mid der Zeid hodder si widder beruhichd und nach är boor Minud´n hodder des Bläddler widder zsammglehchd.

 

Dermid däih Werbung dou drin ah a weng ern Sinn machd, hodder däih hald ah er bisserler ohgschaud. Gleih aff der erschd´n Seid´n hodder gschduzd und fängd oh vom Leder zu zäihng. 

"Edzerdler schdelld Eich des ermohl vuhr! Nedd blous di Weiberbuhsn odder Fedd absaung denners edzerdler, sondern sugohr es Gsichd konnsder rebariern louhn. Dou gibds er Glihnig in Nernberch, dou koh mer fier dreidaus´nd Schdegg´n fasd er neihs Gsichd machn louhn! Ja gibbds denn des a nu!"

Aff ahmohl kummd aus der hindern Egg´n dem glanner Harry sei Schdimm:

" Horch ermohl, wennsd selber ned suviel ahfdreihm konnsd, Ich konnders feih dererwall leiher!"

 

Vom Koch hod mer nix mehr gherd; abber wenner des Gsichd, deser gmachd hod, bhald´n hodd, nou hodder wergli är Gsichdsobberadzion brauchd!