Nachdärberd
                        (oder: …aus Kindergosch´n)

 Es is edzerdler scho er wenger Zeid her; also gnauer gsachd, wäih di Schbrössling voh meiner Exschwähcherin in di Schuhl kummer sin.

Noddierlich hadds dann nach erweng anner Zeid ah ermohl ern Elternahm´d gehm.

Wall mei Schwähcheri a hodd wiss´n wolln, wos ihre Glahner er su dreihm, hoddser si ern Dermin gehm louhn und is schließli und endli a rechdzeidich dord gwehs´n.

Su im Grouß´n und Ganz´n is goud gloff´m und die Lehrer wohrn ganz zfried´n mid´m Sohn und mid´m Döchderler.

Wäihs dann su affs End zouhgäihd und es verabschied´n immer näherrüggd, sachd af ahmohl däi Lehreri vom Döchderler: „Därf ich Sie ahmohl wos frouhng?“ „Nodierli!“ hodd meih Schwähcheri gsachd und hodd erweng ward´n mäihn, wall däi Lehreri er weng rumdruggsd hodd. Aber schliehsli und endli is dann doch rausgruggd:

Mich dähd blous ermohl inderessiern wos Sie und Ihr Moh ärberd´n. Wäihs ühbli is, hob i die Kinder in die erschd´n Dohch nodierli a noch die Eltern gfrouchd und su nochernander hom des alle ganz goud erglärd. Blous wäih Ihr Glahne an der Reiher wohr, Sach´d des Mahderler: < mei Vadder is im Gnasd und mei Mudder ärberd nachds! >  Vielleichd kenner ser Si vuhrschdelln, dass i dou scho erweng gschduzd hob!“

Und dann hods ganz verduddzd glodzd, wäih mei Schwähcheri laud es lach´ng ohfängd.

„D´schuldichung! Des douhd mer edzerdler scho leid, abber des is ja wergli blous nu zum Derschäihs´n! Der größde Hammer abber is, dass des Mahdler di Wohrheid gsachd hodd. Si mäihn nähmli wiss´n, dass mei Moh Jusdizvollzuchsbeamder is und ihch, ihch ärberd ausschließli als Nachdschwesder im Grang´gnghaus!“

Goddseidank sin di massd´n Leihd scho hammganger gwehs´n, wall des Gelächder voh dehner zwaa Weibs´n hädd ern riesich´ng Mensch´nauflauf verursachd.