Also ich wohn zwohr ned innerer Villngech´ngd, abber er Glos´schermvierd´l is ja a ned grod. Deswehng kummd bei uns die Müllabfuhr a immer büngdli am Freidohch fräih suh immer um die selbe Zeid; außer es is er Feierdohch und es mouh verlehchd odder vohrzuhng werrn.

Ab und zouh bassierd suwos hald ermohl und dann gäihd es Gerenne oh, wallmer dann aus´m wöchendlich´ng Alldohchsdrodd draus kummd.

Vuhr allen Dingen is ja douh edzerler seid Jahren ah alles razionalisierd worrn und die Laihd mäihn ihre Müllahmerler vuhr aff die Schdrass bringer, dermid des Ausleern zügicher gäihd. Abber billicher is deswehng gornix worrn!

Am Gründonnerschdohch, wäih i des nu er weng endfernde Gschebbere voh die leern Müllahmer g´hährd hobb, ismer grohd nu eigfalln, daß ern Dohch eher gleerd werd und ich bin in aller Seelnrouh nausganger um mei Mülldonner a nu midd hiezuschdelln.

Wallis glei widder wechrahmer wolld, bini erweng schdäi bliehm und hob hald er weng gward und dererwall in Briefkasd´n neihgschaud. Abber es is gans schäih schnell ganger und ich hobb däi Donner widder in den mir zoudaihld´n Bedongkasd´n nei gschdelld.

Aff amohl kummd die Nachbari vom hindersd´n Reierheisler im Morngmand´l und Logg´nwiggler ohgrennd und schreid zu dem fleissich´ng Müllmoh: "Ach godderler nah, bin i zu schbähd droh?"

Sachd douh ned der junge Ruhzslöffel: " Naa, goude Fraa, kenners scho nu nei hupf´m!"