Wergli wohr! (oder: Jou wergli!)
Schdelld Eich ermohl vuhr, ausgrechnd im Winder, bei derer Käld gäih ich ausnahmswais an ern Samsdohch vuhrmiddohch in die Nernbercher Innerschdadd nei, schbrich "Siddie". Abber ich hobb hald er neie Jeans brauchd, wall mer mei alte nimmer bassd hod. Dass er weng durchgwezd wohr, hodd mi ja gohr ned gschdehrd; is ja gans modern heidzudohch. Abber der Bund, der is hald nimmer zouganger. Dou mou mer hald doch die Iniziadiefe ergreif´n und selber wos dou, beziehungsweis neischlubf´m; zum Ohbrobiern mahni.
Also schdelli mei rosdmedallich farbene Luxuskudsch´n in su er P.S.-Wolg´n-grazerler nei, wall des immer nu billicher kummd wäih er Schdrahfzedderler. Gans schäih bald, dermid i nu ern freier Bladds ergadder.
Wäih i dou su gans gmiedlich durch die Fouhsgängerzohne schlurch, mergi aff amohl, dass meine Lungerfliecherler langsam Endzuhchserscheinunger homm und innerlich gwärmd werrn mäihn bei derer Käld.
Ich fisch in meine Dasch´n nouch meine Glimmschdengl und hobbs a gleih gfund´n. Abber su lang i ah gschdöberd hobb, es Feierzeich wohr nercherds ahfzudreim. Nouch ern halberd´n Stribbdiehs is mer kummer, das des bläide Ding nu im Auto liehng mous. Hodds mi desmohl kald derwischd! Obwohl i derhamm und sunsd in jeder Jagg´n, also iehberohl, suhviel voh däih Dinger hobb, dass is verkahf´n kännerd!
Su viel Laid wohrn su fräih nu ned underwehchs, abber zum Gligg kummd mer dou er Moh middlern Alders in Houd und Mandl endgehng.
Er weng schinierd hobb i mi scho, bei däih Hauf´n Nichdraucher und Andiraucherkambanien. Abber zrigglahf´m wolld i ah nimmer. Also hobb i in den sauern Abfl beiss´n mäihn und allen Muhd zsammg´nummer. Gans höhflich hobb i den Moh gfrouchd: "Dschuldigung, hädd´n Sie zufällich er Feier fiehr mei Zigeredd´n; ich hobb meins im Audo liehnglouhn".
Er schaud mi oh und fängd oh, midd alle zwaah Händ in seine Dasch´n umernander zu baggern. Aff amohl zäichd er mid seiner link´ng Händ er Schdreichhulz-schächderler und mid der rechd´n Händ er Einwehchfeierzeich raus; häld mers fuhr mei Nos´n und sachd: "Suwos mouh er Raucher immer bei sich drohng!"; schdeggd beides widder eih und gäihd einfach weider.
Ich bin dou gschdand´n wäih er Debb und hobb mer echd ihberlechd, obbi edzerdler ned doch besser es Rauhng ahfgibb....
